2024 жылдың өзінде Қазақстан 2 пайыздан аз ғана электр энергиясын өзге елдерден импорттаған, деп хабарлайды inbusiness.kz сайты.
Бұл туралы ҚР Энергетика вице-министрі Сұңғат Есімханов кеңінен айтып берді. Оның сөзінше, еліміздегі бұл саладағы тапшылық мәселесі 2 жылда толық шешімін таппақ.
– Былтыр 120 млрд кВтс тұтындық, ал сырттан сатып алғанымыз 2,2 млрд кВтс шамасында болды, яғни 2 пайыздан аз. Биыл импортталатын энергияны елеулі түрде азайтуға әрекет етіп жатырмыз. Осы жылы электр станцияларын жөндеуге екпін қойылған. Биыл жаңа энергия қуаттарын іске қосамыз, – деді ол.
Энергетика вице-министрі осылайша алдағы екі жылда Қазақстан өзін толықтай электр энергиясымен қамтамасыз ететінін алға тартып отыр. Осы жылы да жоғарыда айтылған 2 пайызды азайтуға жұмыс істелмек.
Осыған дейін ақпан айында Сенатта "Қазақстан Үкіметі мен Ресей Үкіметі арасындағы ҚР мен РФ-тің біртұтас энергетикалық жүйелерінің қатар жұмыс істеуін қамтамасыз ету жөніндегі шаралар туралы келісімді ратификациялау туралы" Заңы мақұлданған болатын.
