NASA астронавты Дональд Петтит 7 айлық ғарыштық миссиядан кейін Жерге оралды, деп хабарлайды inbusiness.kz сайты.
АҚШ-тың Ұлттық аэронавтика және ғарыш кеңістігін зерттеу басқармасының (NASA) астронавты Дональд Петтит 7 айға созылған ғарыштық миссиядан кейін Жерге оралды. Бұл оқиға оның 70 жасқа толған күнімен тұспа-тұс келді.
Sky News басылымының мәліметінше, Петтит – АҚШ-тағы ең егде жастағы қызмет етуші астронавт. Ол Ресейлік ғарышкерлер Алексей Овчинин және Иван Вагнермен бірге Халықаралық ғарыш станциясында (ХҒС) 7 айлық ғылыми зерттеу жұмыстарын жүргізді.
Үшеуі мінген "Союз МС-26" ғарыш кемесі 20 сәуір күні Қазақстан аумағына сәтті қонды.
"Кеме орбитадан сәтті шығып, Жерге қонды", – делінген ресми хабарламада.
Экипаждың 7 айлық ғылыми миссиясы 2024 жылғы 11 қыркүйекте басталды. Осы уақыт ішінде ғарыш кемесі 220 күн ішінде Жерді 3 520 рет айналып шықты. Бұл – Петтит пен Овчинин үшін ғарышқа төртінші, ал Вагнер үшін екінші сапар болды.
NASA мәліметінше, Дональд Петтит орбитада бірнеше маңызды зерттеу жүргізген. Ол металлдан 3D-басып шығарудың мүмкіндіктерін жетілдіру, суды залалсыздандыру технологияларын жақсарту, өсімдіктердің түрлі жағдайларда өсуін және микрогравитация жағдайындағы оттың қасиеттерін зерттеген.
