Сенат төрағасы Қасым-Жомарт Тоқаев бастаған Қазақстан делегациясы ТМД мен ҰҚШҰ парламентаралық құрылымдарының жұмысына қатысу үшін Сан-Петерборға келді, деп хабарлайды сенаттың баспасөз қызметі.
26 наурызда Ұжымдық қауіпсіздік шарты ұйымы Парламенттік Ассамблея кеңесінің отырысы болды. Оның күн тәртібі ұжымдық қауіпсіздік шартының қол қойылуының 25 жылдығына, ҰҚШҰ-ның құрылуының 15 жылдығына және ҰҚШҰ Парламенттік Ассамблеясының құрылуының 10 жылдығына арналды.
Қасым-Жомарт Тоқаев ҰҚШҰ-ны Еуразиядағы әскери-саяси тұрақтылықтың маңызды факторы болып отырған беделді халықаралық құрылым ретінде сипаттады. Төраға "ҰҚШҰ әлеуетін және біздің ұйым аясындағы әріптестікті нығайту Қазақстан Республкасының мүддесіне толықтай сай келеді, сондықтан оның қызметін үдетуге бағытталған бірқатар нақты ұсыныс енгізген президент Нұрсұлтан Назарбаевтың ұдайы назарында болып отыр", – дейді ол.
Сенат төрағасы жаһандық және аймақтық қауіпсіздіктің негізгі буындарының бірі ретінде ҰҚШҰ өз рөлін нығайтуы тиіс деп санайды.
"Белсенді ынтымақтастық пен өзара іс-қимылсыз халықаралық терроризмге қарсы бірлесе қарсы тұру, Ауғанстанды тұрақтандыруға жәрдемдесу, ұзаққа созылған текетіресті реттеу және жалпы алғанда қауіпсіздік, қарусыздану және сенім шаралары мәселелері бойынша ауқымды диалог мүмкін емес", – дейді ол.
Қасым-Жомарт Тоқаев ұжымдық қауіпсіздік жүйесін құқықтық тұрғыда қамтамасыз етуге, біздің мемлекетіміздің заңнамасын жақындастыру мен үйлестіруге бағытталған ҰҚШҰ Парламенттік Ассамблеясының қызметіне жоғары баға берді. Ол Қазақстан Парламенті ҰҚШҰ аясында қол қойылған барлық келісімді уақтылы ратифициялағанын айтты. Сенат төрағасы Қазақстан делегациясы парламенттік дипломатияны нығайтуға бағытталған жұмысты жалғастыра беретінін жеткізді.
