"Қазақстан Барысы" турнирінің биылғы іріктеу сындары 1 сәуірде басталады. Бұл туралы Астана қаласында өтіп жатқан "Қазақстан Барысы" қазақ күресін дамыту қорының баспасөз маслихатында айтылды, деп хабарлайды inform.kz.
Қазақстан Республикасы Тұңғыш президентінің жүлдесі үшін дәстүрлі түрде өтіп келе жатқан турнир биыл да Астана күніне орай 2 шілдеге жоспарланған. 1 сәуір күні ауылдық жерлерде басталатын іріктеу жарыстары кейін аудандық, облыстық деңгейде жалғасады. Кезекті VII турнирдің жеңімпаздары 2 шілде күні елордада анықталады.
Айта кетейік, биыл "Қазақстан Барысының" ақтық сыны 2016 жылы іске қосылған "Барыс Арена" спорт сарайында өтеді. Оған 12 мыңға жуық жанкүйер келеді деп күтіліп отыр. Алғашқы жылы "Дәулет" спорт кешенінде (3000 адам) өткен белді бәсеке кейінгі бес жыл бойы "Сарыарқа" республикалық велотрегінде (10 000 адам) ұйымдастырылып келді.
2012 жылдан бері қазақ күресінен республикалық турнирді Ресейдің "Боец", Түркияның "TRT Avaz" және "Қазақстан" ұлттық телеарнасы көрсетеді. Ал биыл бұл телеарналарға Ресейдің беделді "Матч ТВ" арнасы қосылды, дейді "Қазақстан Барысы" жобасының авторы Арман Шораев.
"Ұйымдастыру тобының басты мақсаты – қазақ күресін насихаттау, ұлттық спортты барынша танымал ету. Бір кездері ұмыт қалған қазақ күресін қайта жаңғырту жобасы өз жемісін беріп отыр. Төл күресті серік еткен бүлдіршіндер саны жыл сайын мың спортшыға артып келеді. Бүгінгі күні елімізде қазақ күресімен шұғылданатын 103 681 балуан бар. "Қазақстан Барысы" турнирінде жеңімпаз және жүлдегер атанған түйе балуандар халықтың зор ықыласына бөленіп, танымал тұлғаларға айналды. Сол үшін алдағы уақытта қазақ күресін шетелде де кеңінен насихаттауды жөн санап отырмыз", –дейді ол.
Естеріңізге салайық, осыған дейін "Қазақстан Барысы" атағын 2011 жылы – Ұлан Рысқұл, 2012, 2015 және 2016 жылдары – Бейбіт Ыстыбаев, 2013 жылы – Айбек Нұғымаров, 2014 жылы – Мұхит Тұрсынов жеңіп алған болатын.
