АҚШ президенті Дональд Трамп елдің сауда балансының тапшылығы қауіп-қатеріне байланысты төтенше жағдай режимін жариялайтынын айтты, деп хабарлайды inbusiness.kz сайты EADaily-ге сілтеме жасап.
Оның айтуынша, сауда балансы дефицитінің АҚШ-тың ұлттық қауіпсіздігі мен экономикасына айтарлықтай қаупі бар.
"Оның негізгі көзі АҚШ-тан тыс жерлерде, негізгі сауда серіктестерінің ішкі экономикалық саясатында және әлемдегі сауда жүйесінің құрылымдық теңгерімсіздігінде жатыр. Осыған байланысты елде төтенше жағдай жариялаймын", - деді Ақ үй басшысы.
Дональд Трамп АҚШ пен өзге мемлекеттер арасындағы екіжақты сауда қарым-қатынасында "өзара ашықтық жетпейтінін" айтты. Оның сөзінше, "Вашингтонның сауда серіктестерінің тарифтік мөлшерлемелері мен тарифтік емес кедергілері, экономикалық саясаты" салыстыруға келмейді. Салдарынан бұл Американың ішкі ахуалына әсер етіп отыр.
CNN жазуынша, Ақ үй басшысы төтенше жағдайды енгізу арқылы тарифтерге қатысты біршама өкілеттік алып отыр. 2 сәуір күні АҚШ президенті ондаған елге қатысты 10 пайыздан 50 пайызға дейінгі баж салығын жариялады. Бұл шаралар 9 сәуірде күшіне енеді. Ал 5 сәуірден бастап басқа елдерге қатысты 10% мөлшеріндегі базалық кедендік баж қолданыла бастайды.
