Қаржылық мониторинг агенттігі төрағасының орынбасары Жеңіс Елемесов Сенат кулуарында Перизат Қайраттың ісіне қатысты пікір білдірді, деп хабарлайды inbusiness.kz сайты.
ҚМА өкілінің сөзінше, Перизат Қайрат оңалту орталығының құрылысына, Палестинада зардап шеккендерге және былтыр болған елдегі су тасқынының салдарын жоюға деп қаражат жинаған.
"190-бап "Алаяқтық" бойынша үш эпизодқа қатысты тергеу аяқталды. Бұдан бөлек қылмыстық жолмен алынған қаржыны заңдастыру, оларды активтерге біріктіру арқылы сияқты екі дерек бар", - деді Жеңіс Елемесов Сенат кулуарында.
Қаржылық мониторинг агенттігі төрағасының орынбасары жәбірленушілердің нақты санын айта алмайтынын айтты.
Атышулы істе Перизат Қайрат анасының да аты аталады.
"Біз оны Қылмыстық Кодекстің 190-бабы "Алаяқтық" және 218-бабы "Қылмыстық жолмен алынған ақшаны және (немесе)өзге мүлікті заңдастыру (жылыстату)" бойынша жауапқа тартып жатырмыз. Оның анасы қазір үй қамақта отыр", - деді агенттік өкілі.
Айта кету керек, осыған дейін Перизат Қайратқа қатысты істі тергеу аяқталғанын жазғанбыз. Ол өзіне тағылған айыппен келіспей отыр.
