Іс материалдарынан анықталғандай, ерлі-зайыптылар әлеуметтік қауіпті мәлімдемелер жариялаған. Олар мұндай мәлімдемелерін бүкіл әлеммен бейнебайланыс жасауға мүмкіндік беретін танымал сервис – "Чат рулетка" қосымшасында жасаған.
Сотталушылардың өз кінәсін мойындамағанына қарамастан, ерлі-зайыптылардың кінәсі дәлелденді. Іске қылмыстық құқық бұзушылықтың жасалу мән-жайлары жазылған және кешенді сот-психологиялық-филологиялық сараптамасы жүргізілген. Соған қарамастан сотталушылар кінәларын мойындамай, өздерін ақтауды сұрады.
Ал заңда ауыр экстремистік қылмыстар санатына жатқызылған бұл әрекет үшін бес жылдан он жылға дейінгі мерзімге бас бостандығынан айыру жазасы қарастырылған.
Не айтуға болады? Әділ сот, әділ жаза. Бұған дейін де талай қазақстандық азамат сепаратистік бағытта ой-пікір айтқан. Олардың көпшілігі жазадан кешірім сұраумен құтылғаны рас. Сондықтан Солтүстік Қазақстан облысында сепаратистік әрекеті үшін ерлі-зайыптының сотталуы өзгелерге ескерту болар.
Естеріңізде болар, "Европа плюс Қазақстан" радиосының жаңалықтар бөлімінің жүргізушісі тіпті тәртіп орнату үшін "Вова ағайды көмекке шақырамыз" деп салғаны да кеше ғана. Вова ағай деп отырғаны – Путин. Ресейдің Украинаға басып кіргеніне масаттанған радио жүргізушісі қазақстандықтарды әсіре ұлтшыл деп айыптаған.
Осы сияқты мысалдарды көптеп келтіруге болады. Ұлтараздықты туындататын мұндай сепаратистік ұстанымдар Қазақстан азаматтарының санасына қайдан келіп жатыр. Әрине, бірінші кезекте Ресейден келеді. Әсіресе депутаттары жүйелі түрде Қазақстанның біртұтастығына қайшы келетін қаңқу сөзді айтып келеді. Ондай сөздің бәрін Кремль саясаткерлерге әдейі айтқызады деген түсінік қалыптасқан. Мұның шындығы бар да болар. Тіпті бір кездері президент Владимир Путиннің өзі де беті бүлк етпей қазақтың жерінде мемлекет болмаған деп салған жоқ па?
Қазақстандағы сепаратистік ұстанымдағылардың қолтығына су бүркетін де Ресейдегі саясаткерлер мен шенеуніктер екені бесенеден белгілі. Оған қоса Ресей телеарнасының насихаты да қазақстандықтардың санасын айналып өтіп жатқан жоқ. Насихаттың шовинистік бағытта екені айтпаса да түсінікті. Ресейлік арналардың Қазақстан аумағына енуіне тосқауыл қояйық деп жүрген қоғам белсенділері аз емес. Өкінішке қарай әзірге нақты нәтижеге қол жетпей тұр, халық Ресей телеарналарының насихатын күн сайын тыңдап отыр. Бұл да сепаратистік көңіл-күйдің ширай түсуіне септік жасайтыны жасырын емес. Не де болса, өз азаматтарымыздың идеологиялық және ақпараттық қауіпсіздігін қамтамасыз етпей, шетелдік пропаганданың ықпалын жоймай, бұндай "үй ішінен үй тіккендерден" құтыла алмаспыз.
Автордың пікірі редакцияның көзқарасымен сәйкес келмеуі мүмкін
