Футболдан Испания ла лигасының ХVІІ турында "Реал" өз алаңында "Барселонадан" ойсырай ұтылды. Мадридтегі "Сантьяго Бернабеу" стадионында өткен ойында каталондық клуб 3:0 есебімен жеңіске жетті, деп хабарлайды vesti.kz.
Ойындағы үш гол да екінші таймда соғылды. 54 минутта Серхио Робертоның пасынан кейін Луис Суарес есеп ашты. Араға 10 минут сала Лионель Месси 11 метрлік пенальтиді сәтті орындады. Бұл тұста қақпаға еніп бара жатқан допты қолымен қайтарғаны үшін Даниэль Карвахаль алаңнан қуылған еді.
Ойын аяқталар тұста алаңға шыққан Алеиш Видаль корольдік клуб қақпасына үшінші голды соқты. Нәтижелі пасты Лионель Месси берді.
17 ойыннан кейін 45 ұпай жинаған "Барселона" айқын көш бастап келеді. Ал "Реал" болса 16 ойыннан 31 ұпай жинап, төртінші орында тұр.
