Журналистер мерекесі қарсаңында арнамыздың ұжымы тағы бір марапатқа ие болды. Ол - аптаның әр сәрсенбісі сайын тікелей эфирге шығатын экономист Жанар Тайжанованың "Эксперт" бағдарламасы. Бұл - экономиканың әлеуетін арттыру мақсатында жасалатын қадамдарды қалт жібермей, ағымдағы мәселелерді білікті мамандармен сарапқа салатын хабар. Тұңғыш бағдарлама осыдан тура бір жыл бұрын "Мемлекеттік қызмет және бизнес" деген хабармен басталған болатын. Сондан бері көрермен назарына 50 бағдарлама ұсынылды. Мемлекеттік қызмет істері және сыбайлас жемқорлыққа қарсы іс-қимыл агенттігі ұйымдастырған "Кәсіби мемлекеттік қызмет – бәсекеге қабілеттіліктің көзі" атты байқауда жеңімпаздар қатарынан көрінген әріптестеріміз "Үздік телехабарлар циклі" номинациясында жүлдегер атанды.
Жанар Тайжанова "Эксперт" бағдарламасының жүргізушісі:
"Өз басым кәсіби журналист болмасам да, осы мемлекеттік қызмет саласындағы реформаларды насихаттауға, мемлекеттік қызметші имиджі туралы бағдарлама жасауға мүмкіндік берген "Атамекен бизнес арнасына" үлкен алғысымды білдіремін. Өз басым осы күнге дейін өз саламда қанша жетістікке жетіп, қаншама сый марапатқа ие болсам да, осынша қуанып көрмеппін. Бұл мен үшін өте жоғары, жоғары дәрежедегі марапат."
