Сот "Жезқазған энергосбыт" компаниясын тұтынушыларға 1 млрд теңге қайтаруға міндеттеді, деп хабарлайды Теміртау қаласы әкімдігінің баспасөз қызметі.
Қарағанды облысының мамандандырылған ауданаралық экономикалық соты монополияға қарсы ведомствоның "Жезқазған энергосбыт" ЖШС-не жіберілген талабын қарастырды. Жезқазған аймағын электр қуатымен қамтамасыз етіп отырған монополист тариф жөніндегі істе жеңіліп қалды. Сот көтеріңкі тарифтерді заңсыз деп тауып, кәсіпорынды бір ай аралығында тұтынушыларға 1 млрд теңгені қайтарып беруге міндеттеді.
"Жезқазған Энергосбыт" ЖШС сот шешімі заңдық күшіне енген соң 30 күн аралығында тұтынушыларға 1 014 879 300 теңгені қайтарып беруі керек.
Оған қоса, сот компаниядан мемлекеттік бюджет кірісіне 30 млн теңге көлемінде мемлекеттік баж өндірді.
"Жезқазған энергосбыт" төңірегіндегі тарифке қатысты дау-дамай ұзақ уақыт жалғасып келеді. 2015-ші жылдың 1-ші қаңтарынан бастап қызмет көрсетуші халыққа қосымша құн салығысыз 1кВт/сағатына 18,83 теңге көлемінде шот жібере бастаған. Ол баға монополияға қарсы органмен келісілмеген.
