Алматы облысының экспорттық әлеуеті артты. Бұл әсіресе агросалада анық байқалады. Мәселен, қазір Кербұлақ ауданында техникалық қарасора өсіріліп жатыр. Мамандар: "шөп құрамында есірткі жоқ", – дейді. Оның талшығы тоқыма, автокөлік және компьютерлік өндірісте кеңінен пайдаланылады. Сондықтан шикізат тек шет мемлекеттерге сатылмақ, деп хабарлайды 24.kz.
Тәжірибелік мақсатта қарасора тұқымы республика бойынша 5 облыстың аумағына себіліпті. Бірақ Алматы облысында бітік шыққаны көрініп тұр. Бұл – топырағы құнарлы Кербұлақ ауданы. Мұнда 600 гектарға қарасора егілген. Жалпы оның талшығына шетелде, әсіресе автокөлік өндіретін мемлекеттерде сұраныс жақсы.
Еліміз бойынша соя мен жүгері алқаптарының 95%-ы Алматы облысына тиесілі. Аймақта шығатын техникалық бағыттағы өнімдердің жартысы Азия мен Еуропаға экспортталады. Енді өңірде қарқынды бау-бақша ісімен айналысу жүріп жатыр. Қазір мұнда инновациялық технология негізінде 5 мың гектарға бау-бақша отырғызылған.
Облыс бойынша дәрі-дәрмек те экспортталатын тауарлар қатарында. Сонымен қоса ет өндірісі де артқан. Аймақта соңғы бірнеше жылда 5 мың басқа арналған 6 бордақылау кешені құрылған. Қазір өңірде ірі және ұсақ малдың етін өңдейтін екі зауыттың құрылысы жүріп жатыр.
