Оқушылар тұтынатын ас мәзіріне бірқатар өзгеріс енгізілген, деп хабарлайды inbusiness.kz сайты.
Министр Үкімет үйінде өткен баспасөз жиынында тыйым салынған тағам түрлеріне жеке-жеке тоқталып өтті.
– Өткен жылдың соңында жаңа стандарт бекітілді, оған сәйкес дайын тағамдардағы қант мөлшері 3,5 есе, ал тұз мөлшері 2-2,5 есе азайтылды. Сондай-ақ, оқушылар тағамына қатысты қатаң шектеу енгізіледі, әсіресе, мектептегі буфетке қатысты. Атап айтқанда, мектеп асханасында тез қорытылатын көмірсуларға, чебурекке, майға қуырылған бәлішке, гамбургер, тағы сол сияқты фаст-фуд түріне тыйым салынады, – деді ол.
Ақмарал Әлназарованың пікірінше, мектеп асханасында шоколадты батондар мен тәтті газдалған сусындарға да шектеу қойылмақ.
Ведомство басшысы айтуынша, 1 қыркүйектен бастап мектеп асханасындағы кейбір ас мәзіріне тыйым салынады. Бұл шектеудің бәрі оқушылардың денсаулығы үшін жасалып отыр.
