Қазақстанның халық әртісі Роза Рымбаева демалыс күндері өтетін "Думанды Сарыарқа" концерттік бағдарламасына қатысады, деп хабарлайды Астана әкімдігінің ресми сайты.
Еліміздің эстрада жұлдызы елорданың 20 жылдығын мерекелеу аясында 1 шілдеде Үркер кентінде (Ильинка) өнер көрсетеді. Концерт №69 мектеп-гимназиясының аумағында өтеді.
Елорда әкімдігінің ұйытқы болуымен өтетін шара сағат 19:00-де басталады. Қала тұрғындары мен қонақтары Роза Рымбаевадан басқа Досымжан Таңатаровтың, ағайынды Жүгінісовтердің, "Арт Домбыра" триосының, "Дәуір" дуэтінің, Әсем Омарова мен басқа да әртістердің өнерін тегін тамашалай алады.
Екі жылдан бері жазда мәдени-бұқаралық іс-шаралар тек қалада ғана емес, сонымен қатар оның шет аумақтарында да ұйымдастырылып келеді. Жексенбі күндері Пригородный, Интернациональный, Мичурино, Күйгенжар, Өндіріс, Железнодорожный, Үркер, Көктал, Промышленный және Казгородок кенттерінің тұрғындары үшін мерекелік шаралар өткізіледі. Демалыс күнгі "Думанды Сарыарқа" концерттері тұрғын алаптары тұрғындарының арасында кеңінен белгілі. Шара аясында танымал қазақстандық әртістер, Қанат Әлжаппаров пен Қайрат Әділгерей сынды әзілкештер өнер көрсетеді. Бұдан басқа би және музыкалық ұжымдар, көше театрларының әртістері, аниматорлар, интерактивті ойындар өткізетін бойшаң қуыршақтар да белсене қатысады.
Биыл демалыс күнгі "ДумандыСарыарқа" концерттері 1 маусымнан 2 қыркүйекке дейін ұйымдастырылады. Барлық шаралар ашық алаңдарда тегін өтеді.
