Мәжіліс депутаты Елнұр Бейсенбаев елдегі жұмыссыздардың саны 1 миллионнан асқанын мәлімдеді, деп хабарлайды inbusiness.kz сайты.
Халық қалаулысының айтуынша, республикада жұмыссыздық азаймай отыр.
"Цифрланған заманда статистиканы бұрмалау – ауруын жасырғанмен тең. Мысалы, Үкіметке сенсек, соңғы 15 жыл бойы жұмыссыздық 4-5 пайыздық өзгермейтін көрсеткіште тұр. Ал шындығында, елімізде жұмыссыздардың саны 10-12 пайыз, яғни 1 миллионнан асады. Оған дәлел МӘМС жүйесінен тыс қалған 3,5 миллион адам, тіпті 1 теңгелік зейнетақы жарнасы жоқ 3 миллион азамат, өзін-өзі жұмыспен қамтыған 2 миллион адам, "NEET" санатындағы 400 мың жас. Бұлардың барлығы ешбір тіркеуде жоқ, мүлдем табысы жоқ. Табысы болса, оның өзі маусымдық табыс", - деді депутат Мәжілістің жалпы отырысында.
Елнұр Бейсенбаев 2027 жылға қарай еңбек нарығына қосымша тағы 300 мың жас маман қосылатынын тілге тиек етті.
"Ал Үкімет оған дайын емес. Өңірге сапар барысында да халықтың ең көп сұрайтыны – осы жұмыспен қамту мәселесі. "Екі қолға бір күрек табылар" деген халық тәмсілі талай ауыл жұртына арман болып отыр. Сондықтан мәселені жасырып жаппай, статистиканы бұрмаламай, нақты жұмыс орындарын ашу бойынша жүйелі шараларды қолға алған жөн. Мәселенің бар екені айдан анық", - деді ол.
