Наталья Лакманның 25 метрдік құдығындағы су қаңтар айында тартылып қалған. Айтуынша, күнделікті ішуге тұрмақ, кір жуатын су жоқ. Мұндай жағдай бұрын соңды болмаған.
"Осы құдықпен жан бағып отыр едік. Осыдан алған суды ішіміз де, жуынамыз, тамақ та пісіреміз. Енді қазір құрғап тұр, тамшы да жоқ. Масқара ғой мынау", дейді Жаңа Тихонов ауданының тұрғыны Наталья Лакман.
Новая Тихоновка елдімекенінің 10-мыңнан аса тұрғыны сусыз отыр. Тіптен құдықтың өзінде су жоқ.
"Сатып аламыз да ішеміз ғой. Қазір судың литрі 15-20 теңге. Бұрын арзан еді, қазір қымбаттап кетті. Сосын әр жердегі бұлақтардан алып келеміз", дейді Жаңа Тихонов ауданының тұрғыны Қарлығаш Сыздықова.
Құдықтағы судың тартылуы елдімекен іргесіндегі күл үйіндісінің салдарынан, дейді тұрғындар. Себебі, Жылу энерго орталығынан шыққан қалдық екі өзен арнасының маңына төгіледі екен. Ал, монополистер сол су қоймаларының арнасын бұрып жіберген. Алайда, компания өкілдері бізден кінә жоқ деп отыр.
"Иә, өзен арналарын бұрғанымыз рас. Бірақ, елді мекеннің сусыз қалуына мұның еш қатысы жоқ. Біз арнайы құжаттарда көрсетілген нормаға сай жұмыс істедік", дейді "Қарағанды Энерго Орталық" ЖШС бөлім басшысы Дмитрий Беседин.
Ал, осы күнге тіршілік нәрінсіз отырған бүтін бір елді мекенге арнайы су таситын көлік келмеген. Қарағанды қаласының әкімдігі болса, бұл ауданға орталық су жүйесін орнату әлі жоспарланбағанын айтады.
"Биыл қосылмайды. Өйткені оны қосу үшін, құжаттамалық жоба жасалу керек. Биыл жоспар бойынша, жобаны атқару жұмысын бастаймыз. Келесі жылы қаражат бөлінсе, жұмысын атқарамыз", дейді Қалалық ТҮКШ бөлімінің сектор меңгерушісі Жанболат Тоқмурзин.
Сондықтан, биліктен күдер үзген жұрт арнайы белгіленген күл төгетін орынның жұмысын тоқату үшін, ел Президентіне петиция жолдамақшы. Қазірдің өзінде 5000-нан аса халық қол жинапты.
