Білім және ғылым министрлігі Жоғары және жоғары оқу орнынан кейінгі білім беру департаментінің директоры Әділет Тойбаев комисся шешімімен 10 202 талапкерге магистратура гранты тағайындалғанын мәлім етті.
"Жалпы 2020-2021 жылғы оқу жылына магистратураға 12 829 грант бөлінген еді. Оның 12 119-ы ғылыми-педагогикалық бағытта болса, 710 грант бейіндік бағытқа ұсынылды. Тамыздың 17 мен қыркүйектің 1 аралығында магистратураға түсушілердің кешенді тестілеуі өтті. Алғаш рет компьютерлік форматта өткен тестілеуге 34 746 талапкер қатысты. Кешенді тестілеуге қатысқандардың 13 051-і іріктеудің шекті баллын жинады. Яғни, 75-тен жоғары балл жинады. 5 қыркүйекке дейін конкурске құжаттар қабылданып, 12 179 үміткер қатысты. Бүгінгі комиссияда 10 202 грант берілді. Оның 128-сі бейіндік бағытта", – деді Әділет Тойбаев.
Департамент басшысының айтуынша, биыл ең жоғары сұранысқа ие болған мамандық – шет тілі оқытушысы. Бұл мамандыққа түсу үшін 150 ұпайдың ең кемі 134-ін жинау қажет болған. Ал конкурсы ең төмен бағыт – ветеринария. Мал дәрігерлігіне 72 грант тағайындалған.
Нұржан Көшкін
