ҰЭМ статистика комитетінің мәліметіне сүйенсек, өткен жылы елімізде 397 799 нәресте өмірге келіпті. Соның ішінде 235014-і қалалық жерде өмірге келсе, ауылдарда 162785 нәресте туған.
Нәрестелердің 205224-і – ұл бала (51,6%), 192575-і – қыз (48,4%). Өткен жылы қыздарға қарағанда ұлдардың саны басым болды. Туған кездегі жыныстардың арақатынасы 100 қыз балаға шаққанда 107 ер баланы құрады.
2008 жылмен салыстырғанда туғандар саны 11,6% (ер балалар – 12%, қыз балалар – 11,1%), қалалық мекендерде – 19,4%, ауылдық мекендерде – 1,9% артты.
Туудың жалпы коэффициенті 1000 адамға 2018 жылы 21,77 (2008 жылы – 22,75) туғандарды құрады, қалалық мекендерде – 22,16 (2008 жылы – 23,63), ауылдық мекендерде – 21,22 (2008 жылы – 21,75) құрады.
Қазақстан өңірлерінің ішінде туудың ең жоғары деңгейі Маңғыстау облысында (1000 тұрғынға шаққанда 29,72 туғандар), Нұр-Сұлтан қаласында (27,67) және Шымкентте (27,53) байқалды. Ең төменгі көрсеткіш Солтүстік Қазақстан (12,93), Қостанай (13,30) мен Павлодар (15,72) облыстарында.
