Еліміздегі 11 мың мұғалім аттестациядан өте алмады. Бұл жайында бүгін сенатта өткен жиында білім және ғылым министрінің орынбасары Эльмира Суханбердиева мәлімдеді, деп хабарлайды 24.kz.
Жаңа форматтағы тестілеуге 51 мыңнан астам ұстаз қатысқан. Оның 34 мыңы сынақтан сәтті өтті. Ал қалғандары екінші мәрте аттестацияға қатысып, біліктіліктерін арттырды.
Тағы бір айта кетерлігі, жаңартылған білім беру мазмұны бойынша биыл елде 221 мың мұғалім дайындалды. Бұл педагогтардың 78 проценті. Елбасы тапсырмасына сәйкес, олардың еңбекақысына 30 пайыз үстемақы қосылады.
Мұғалімдердің біліктілігін арттыру курстары қазір де жалғасып жатыр.
"Биылғы жылы 110 мыңнан астам педагог республикалық бюджет есебінен біліктілікті арттыру курстарынан өтуде.Соның ішінде 8 мыңнан астам пән мұғалімі жеке пәндерді ағылшын тілінде оқыту үшін тілдік курстарда білім алуда. Олардың 5 мыңға жуығы осы оқу жылынан бастап сабақ беруге кіріскен. "Ұстаз" орталығы барлық өңірлерде ағылшын тілінде сабақ бере бастайтын 4,5 мыңнан астам мұғалімге қолдау көрсетіп жатыр", - дейді Эльмира Суханбердиева.
