Бұл сұраққа үкімет отырысында қаржы министрі Ерлан Жамаубаев жауап берді.
"9 айдың қорытындысы бойынша мемлекеттік бюджетке 6,1 трлн теңге кіріс кірді немесе жоспар 95,5% атқарылды. Республикалық бюджетке 3 трлн 853 млрд теңге төлем түсті немесе жоспар 85,8% атқарылды. Кіріс бойынша жоспардың атқарылмауы 638 млрд теңгені құрады. Оның ішінде салық – 791 млрд теңге", – деді министр.
Оның сөзінше, корпоративтік табыс салығының атқарылмауына негізгі экспорттық позициялар бойынша бағаның орта есеппен 13,3% құлдырауы, әрекетсіз салық төлеушілер санының артуы, 850 ірі салық төлеуші бойынша мәлімделген аванстық төлемдер сомасының өткен жылдың 9 айымен салыстырғанда 243,5 млрд теңгеге төмендеуі және екінші деңгейлі банктерден түсетін түсімдердің 10,2 млрд теңгеге азаюы себеп болған.
"Қосылған құн салығы бойынша жоспардың атқарылмау себептері келесідей: Өткен жылдың ұқсас кезеңімен салыстырғанда қосылған құн салығын қайтарудың 60% немесе 200 млрд теңгеге өсуі мен "электронды шот-фактуралар" ақпараттық жүйе деректеріне сәйкес, сату бойынша айналымдардың 11% азаюы. Негізгі төмендеу тау-кен өнеркәсібі саласына тиесілі болды. Онда айналым 2019 жылдың ұқсас кезеңімен салыстырғанда 33% немесе 4,3 трлн теңгеге қысқарды", – деді Ерлан Жамаубаев.
Сөз арасында министр 11 мың салық төлеушінің іскерлік белсенділігінің құлдырауына карантин режимі әсер еткенін мәлімдеді.
"Олардан түсім едәуір азайды", – деді Ерлан Жамаубаев.
Қанат Махамбет
