Делиде бокстан әйелдер арасындағы әлем чемпионатында өнер көрсеткен елордалық спортшылар елге оралды, деп жазады inbusiness.kz қалалық әкімдіктің баспасөз қызметіне сілтеме жасап.
"Жалпы бұл нәтижеге көңілім толады. Құрамамыз 6 медаль жеңіп алды. Десе де әлі тынбай жұмыс істеуіміз керек. Алда Азия ойындары келе жатыр. Ол сында біздің боксшылар барынша көбірек Олимпиада жолдамасына қол жеткізуі қажет", - деді Қазақстан бокс федерациясының Атқарушы директоры Маратбек Мықтыбеков.
Отандық спортшылар 2 күміс және 4 қола жүлдені місе тұтты. Аса ауыр салмақ дәрежесінде (+81 кг) ел намысын қорғаған елордалық Лəззат Күнгейбаева əлем чемпионатының екі дүркін жүлдегері, марокколық Хадидже Эль-Мардиге есе жіберді. Екінші күміс жүлдені Карина Ибрагимова (57 келі) жеңіп алды. Тағы 4 спортшы – Алуа Балқыбекова (48 кг), Надежда Рябец (66 кг), Валентина Халзова (75 кг) және Фариза Шолтай (81 кг) қола жүлдеге ие болды.
Жалпы есепте Үндістан 4 алтынмен көш бастады. Үздік үштік қатарында Қытай мен Ресей бар.
Еске салайық, осыған дейін Үндістанның Нью-Дели қаласында өткен байрақты бәсекеде Қазақстан құрамасы жалпыкомандалық есепте 8-орынға тұрақтағанын жазған болатынбыз.
