Бұл туралы Бас прокуратураның қылмыстық қудалау қызметі басшысының орынбасары Елдос Қилымжанов мәлім етті, деп хабарлайды inbusiness.kz.
"Жалпы республика бойынша құқық қорғау органдары қаңтар оқиғасы кезінде ұрланған 846-дан астам шолақ және тегіс ұңғылы қаруды анықтады. Ұрланған қарудың 2 мыңнан астамы әлі де қылмыскерлердің қолында, бұл әлеуетті қауіп төндіретінін атап өтеміз", – деді брифинг барысында Елдос Қилымжанов.
Таразда олар қару-жарақ сақталған орын табылған, оның ішінде Жамбыл облысының полиция басқармасынан ұрланған Калашников автоматы, екі Макаров тапаншасы, SHTURM автоматы, жарылғыш зат пен оқ-дәрілер болған.
Жалпы полиция қызметкерлері заңсыз айналымнан 1 729 қару мен 42 мыңнан астам оқ-дәрі тәркіледі.
Олардың ішінде: 13 гранатомет, 6 пулемет, 169 автомат, 374 тапанша, 266 травматикалық және газды қару.
Соңғы екі аптада ғана 40-тан астам қару тәркіленді. Барлығы 125-тен астам қару қоймасы жойылды.
Сонымен бірге құқық қорғау органдары қарумен ұсталған адам өз еркімен тапсырған деп танылмайтынын еске салды.
Құралай Құдайберген
