Шымкент қаласының прокуратурасы тұрғын үй құрылысына үлестік қатысу саласындағы заңнаманың сақталуына тұрақты түрде бақылау жүргізіп жатқанын мәлімдеді, деп хабарлайды inbusiness.kz сайты.
Қадағалау органы азаматтарды құрылыс жобаларына қаражат салмас бұрын құрылыс компаниясының үлескерлердің қаражатын тартуға заңмен белгіленген рұқсаты бар-жоғын міндетті түрде тексеруге шақырды.
Прокуратураның мәліметінше, тұрғын үй құрылысына жеке және заңды тұлғалардың қаражатын тартуға тек уәкілетті органның немесе жергілікті атқарушы органның тиісті рұқсатын алған компанияларға ғана рұқсат етіледі. Мұндай компаниялардың тізімі "Қазақстан тұрғын үй компаниясы" АҚ мен қала әкімдігінің ресми интернет-ресурстарында жарияланған.
Қолданыстағы заңнамаға сәйкес, үлескерлердің қаражатын тиісті рұқсатсыз заңсыз тартқан тұлғалар әкімшілік және қылмыстық жауапкершілікке тартылады.
Прокурорлық қадағалау актілерінің нәтижесінде соңғы екі жылда үлескерлердің қаражатын тартуға рұқсаты болмай тұрып жарнама жүргізген 48 құрылыс компаниясы әкімшілік жауапкершілікке тартылған.
Қадағалау органы тұрғындарды заңда көзделген рұқсат құжаттары жоқ құрылыс нысандарына қаражат салудан сақ болуға шақырды. Себебі мұндай жағдайда құрылыс аяқталмай қалуы немесе салынған қаражатты жоғалту қаупі жоғары.
