"Қазхром" трансұлттық компаниясы" АҚ 2021 жылы Ақтөбе қаласында жаңа электр станциясын іске қоспақ. Жобаның құны 38,5 млрд теңгеге бағалануда.
"Электр станциясын "Қазхром" мен "Еуразиялық топ" бірлесіп салады", – деді облыстық индустриалды – инновациялық даму басқармасы мамандары.
Аталған станция Ақтөбедегі ферроқорытпа өндіретін зауытты электр қуатымен қамтымақ. Сондай-ақ ол ферроқорытпа газы негізінде жұмыс істейді. Алдын ала жасалған болжам бойынша электр станциясы жылына 46,4 МВт электр қуатын өндіреді.
"Бүгінде жобаның техника-экономикалық негіздемесі жасалып жатыр. Одан бөлек жобалық-сметалық құжаттар дайындалып, негізгі және бөлшек инжиниринг, монтаждық құрылдарды жеткізетін мекемелер анықталуда", – деді басқарма мамандары.
Естеріңізге сала кетсек, "Қазхром" ТҰК" АҚ төрт өндірістік құрылымның басын біріктіреді. Олар: Дон тау-кен байыту комбинаты (Ақтөбе облысы, Хромтау қаласы), "Қазмарганец" кен басқармасы (Қарағанды облысы), Ақсу (Павлодар облысы) және Ақтөбе ферроқорытпа зауыты. Компанияда 19 мың адам жұмыс істейді.
"Еуразиялық топ" – табиғи ресурстарды өндіру мен өңдеу, энергетика, логистика және маркетинг салалары бойынша қызмет көрсететін әлемдегі ірі компаниялардың бірі.
