Бұл туралы Үкімет отырысында Қарағанды облысының әкімі Жеңіс Қасымбек мәлім етті. Оның сөзінше өңірде "Сарыарқа" газ құбыры арқылы 114 елді мекенге газ тарту жоспарланған.
"Бірінші кезеңде үш қалада 3 мыңға жуық үй газбен қамтылады. Қазіргі уақытта Теміртау және Жезқазған қалаларында қабылдау актілеріне қол қойылды және құрылыс жұмыстары аяқталды. Желілерді "ҚазТрансГаз" АҚ-ға сенімгерлік басқаруға беру рәсімі басталды. Осыдан кейін тұтынушылардың дайындығына қарай 1056 үй үшін газбен қамтамтылады", - деді облыс әкімі.
Өңір басшысының сөзінше, Қарағанды қаласында құрылыс жұмысының 70%-ы аяқталған. Құбыр тарту жұмыстарын аяқтау 2021 жылдың мамыр айына жоспарланған.
"Нысан іске қосылғаннан кейін 1 865 үй көгілдір отынмен қамтылады. 2021 жылы Қарағанды, Теміртау және Жезқазған қалаларындағы 3 800 үйді қамти отырып, 2-ші іске қосу кешені құрылысын бастау көзделген. 2021 жылы Жаңарқа, Осакаров аудандарына және Шахтинск қаласында газбен жабдықтау желілерінің құрылысы басталады. Бірінші кезең 3 мыңнан астам үйді газдандыруға мүмкіндік береді. Сондай-ақ 2021 жылы Саран қаласының Ақтас және Дубовская кенттерін газбен жабдықтау үшін жеткізуші газ құбырын салуды жоспарлап отырмыз. РТИ зауыты базасында салынып жатқан 2 кәсіпорынға газ тартылады. Нәтижесінде 2021 жылы шамамен 19 мың адам газбен қамтылады. Жобаға толық қаржы бөлінген жағдайда 2030 жылға қарай облыстың 1 млн 100 мың тұрғыны газға қол жеткізеді", - деді өңір басшысы.
Құралай Құдайберген
