Үкімет отырысында баяндама жасаған ҚР Энергетика министрі Нұрлан Ноғаев осылай деп мәлімдеді. Қазірдің өзінде көгілдір отынмен қамтылғандар саны халықтың 51%-ын құраса, жыл соңына дейін көрсеткіш 53%-ға жеткізілмек.
"2020 жылдың 1 қарашасындағы жағдай бойынша елді газдандыру деңгейі 51,47%-ды құрады немесе 9,5 млн адам көгілдір отынға қол жеткізген. Биылғы жылдың қорытындысы бойынша газдандыру деңгейі 53%-ға немесе 9,8 млн адамға жеткізу күтілуде. Бұл 2015 жылғы деңгейден 10%-ға артық", – деді министр.
2020 жылдың 1 қарашасындағы көрсеткіш бойынша елдің газдандырылуы 90%-дан асатын өңірлердің көшін Атырау облысы бастаған. Мұнда оның деңгейі 99,6% болса, Маңғыстау облысында 99%, Алматы қаласында 98%, Батыс Қазақстан обылысында 96,2%, Шымкенттте 92,1% және Ақтөбеде 90,1%-ды құрады.
Жалпы еліміздегі 6162 елдімекеннің 1468-і немесе жалпы ауылдар санының 24%-ы газдандырылған. Сондай-ақ, соңғы 5 жылда 1334 шақырым магистральді газ құбырлары тартылған.
"2015-2020 жылдар аралығындағы кезеңде республикалық бюджет есебінен әкімдіктерге газдандыру шараларына 125 млрд теңге мөлшерінде нысаналы трансферттер бөлінді. Оның 76 млрд теңгесі соңғы екі жылда бағытталған", – деді министр.
Ал сөз соңында ол 2025 жылы газдандыру деңгейі 2120 елді мекенді немесе 11,7 млн тұрғынды қосумен 60%-ға жетеді деп түйіндеді.
Құралай Құдайберген
