Қазақстанда жасанды интеллект элементтері енгізілген қазынашылық жүйенің жаңа архитектурасы қалыптастырылады. Бұл туралы ҚР Қаржы министрлігінің Мемлекеттік қазынашылық комитеті алқасының отырысында хабарланды, деп жазады inbusiness.kz сайты.
2025 жылдың қорытындысы бойынша мемлекеттік қазынашылық органдары республикалық бюджеттің шығыс бөлігінің кассалық орындалуын 29,6 трлн теңге көлемінде, ал жергілікті бюджеттер бойынша 18,2 трлн теңге көлемінде қамтамасыз етті. Мемлекеттік қазынашылық органдарында 15 мыңнан астам клиентке қызмет көрсетіледі, 49,1 млн-нан астам қаржылық құжат өңделді, төлемге 12,2 млн шот пен төлем тапсырмасы жүргізілді. Жалпы сомасы 2,8 трлн теңгені құрайтын 1 317 МЖӘ шарты тіркелді.
Жұмыстың маңызды бағыттарының бірі бюджетті атқарудың сервистік моделін жетілдіру болды. Қазынашылық бақылау превентивті негізде күшейтілді: жалпы сомасы 3,1 трлн теңгеге төлемдер бойынша 48,4 мың қаржылық құжат және 17 трлн теңге сомасына 435,9 мың төлем шоты қайтарылды.
Өтімділікті басқару шеңберінде алғаш рет республикалық бюджеттің кассалық алшақтықтарын жабу үшін жергілікті бюджеттердің қолма-қол ақшаны бақылау шоттарынан уақытша бос бюджет қаражатын тарту рәсімдері жүргізілді. Олардың жалпы сомасы 47 млрд теңгені құрады және қаражат толық әрі уақтылы қайтарылды. Сондай-ақ цифрлық теңгені пайдалану арқылы пилоттық жобалар аясында Ұлттық банкпен өзара іс-қимыл белсенді түрде дамыды: жалпы сомасы 2,3 млрд теңгеге 28 транзакция жүргізілді, "Цифрлық ҚҚС" жобасын іске асыру жалғасуда.
Ақпараттық технологиялар саласында ISO 20022 халықаралық қаржылық хабарламалар стандартына көшу жүзеге асырылды, мемлекеттік деректер базаларымен интеграция қамтамасыз етілді және "Арнайы түсімдер" санаты енгізілген бюджеттің жаңа құрылымы іске қосылды.
Процестерді автоматтандыруға және бюджеттік ағындарды басқару сапасын арттыруға мүмкіндік беретін жасанды интеллект элементтерін қоса алғанда, заманауи әрі тиімді шешімдерді енгізу жоспарлануда. Цифрлық теңге форматында төлемдер мен аударымдарды жүзеге асыруға, цифрлық шешімдер арқылы мониторинг, болжау және өтімділікті басқару құралдарын енгізуге, сондай-ақ квазимемлекеттік сектор ұйымдары үшін қашықтан қазынашылық қызмет көрсету сервистерін іске асыруға ерекше назар аударылады.
Сонымен қатар, жаңғырту шеңберінде Тәуекелдерді басқару жүйесін енгізу және төлемдерді жүргізу процестерін цифрлық трансформациялау жоспарлануда. Оның ішінде "жасыл дәліз" қағидаты бойынша жалақыны автоматты түрде төлеу және бюджет кірісіне аударымдарды жүзеге асыру көзделген.
