"Қазгидромет" РМК 21 шілдеге арналған ауа райы болжамын жариялап, еліміздің бірнеше өңірінде аптап ыстық, өткінші жаңбыр, нөсер, найзағай, бұршақ, дауылды жел және жоғары өрт қаупіне байланысты дауылды ескерту жасады, деп хабарлайды inbusiness.kz сайты.
Синоптиктердің мәліметінше, Абай облысы мен Шығыс Қазақстан облысының оңтүстігінде күндіз ауа температурасы 41 градусқа дейін көтеріледі. Сонымен қатар екі облыста да 35-38 градусқа дейін қатты ыстық болып, жоғары және төтенше өрт қаупі сақталады.
Елордада кей уақыттарда жаңбыр жауып, найзағай ойнайды, күндіз бұршақ пен дауылды жел күтіледі. Алматы мен Шымкентте өткінші жаңбыр мен найзағай болжанса, Алматы облысының батысы, оңтүстігі және таулы аудандарында, Жетісу облысының таулы өңірлерінде, Түркістан облысының таулы және тау бөктерлі аудандарында да өткінші жаңбыр жауып, найзағай ойнайды. Қызылорда облысының солтүстігінде де жаңбыр мен найзағай күтіледі.
Солтүстік Қазақстан, Ақмола, Қостанай, Павлодар, Қарағанды, Ұлытау, Жамбыл, Абай және Шығыс Қазақстан облыстарының бірқатар аумағында жаңбыр, найзағай, кей жерлерде қатты жаңбыр, бұршақ пен дауыл күтіледі. Желдің екпіні жекелеген өңірлерде секундына 23-28 метрге дейін күшеюі мүмкін.
Жетісу, Алматы, Маңғыстау, Атырау және Батыс Қазақстан облыстарының бірқатар аумағында 35-39 градусқа дейін қатты ыстық күтіледі. Түркістан мен Қызылорда облыстарының кей аудандарында шаңды дауыл болжанса, еліміздің басым бөлігінде жоғары және төтенше өрт қаупі сақталады.
"Қазгидромет" тұрғындарды ауа райының қолайсыз құбылыстарын ескеріп, қауіпсіздік шараларын сақтауға шақырды.
