Павлодар қаласының тұрғыны есірткі сатумен айналысты деген күдікпен полиция қызметкерлерінің қолына түсті, деп хабарлайды inbusiness.kz сайты.
Облыс орталығында есірткі заттарын заңсыз таратумен айналысатын ер адам туралы ақпарат полицияға келіп түскен соң, тәртіп сақшылары жедел-іздестіру шараларын жүргізді. Нәтижесінде бұрын сотталған 29 жастағы күдікті ұсталды. Оның жеке заттарын тексеру барысында тыйым салынған заттардың орналасқан жері туралы деректер бар ұялы телефон және мазмұны белгісіз 16 орама тәркіленді. Сонымен қатар оның автокөлігінен екі полиэтилен пакет табылды.
Сараптама қорытындысы бойынша, орамаларда жалпы құны 22 млн теңгеден астам синтетикалық есірткілер, ал полиэтилен пакеттерде салмағы 1,5 килограмнан асатын синтетикалық каннабиноидтар болғаны анықталды.
Күдікті өз кінәсін мойындап, есірткі тарататын интернет-дүкенде "қаптамашы" болып жұмыс істегенін және "жеңіл табысқа" қызыққанын айтты. Оның айтуынша, ол кураторлардан түскен тапсырмаларды орындап, есірткі заттарын арнайы қоймалардан алып, оларды жасырын орындарға тығу әдісімен таратқан.
– Аталған факті бойынша есірткі немесе психотроптық заттарды заңсыз сатып алу, сақтау, тасымалдау және өткізу бабымен қылмыстық іс қозғалды. Қазіргі уақытта күдікті қамауда. Сонымен бірге аймақ аумағында есірткі жеткізу және таратуға қатысы бар басқа да тұлғаларды анықтау жұмыстары жалғасуда, – дейді Павлодар облыстық полиция департаменті.
Құқық қорғау органдары тұрғындарды қырағылық танытуға, қоғамның қауіпсіздігіне әсер ететін кез келген күдікті әрекеттер туралы дереу хабарлауға шақырады. Азаматтар 102 нөміріне қоңырау шалып, немесе "Police 102" мобильді қосымшасы арқылы ақпарат жеткізе алады.
