ҚР ІІМ хабарлағандай, Алматы мен Шымкент қалаларында, сонымен қатар Алматы, Ақтөбе және Жамбыл облыстарында ұйымдасқан қылмыстық топ мүшелерін құрықтау бойынша бірлескен арнайы операция жүргізілді, деп жазады inbusiness.kz.
"ІІМ ұйымдасқан қылмысқа қарсы күрес департаменті, ҰҚК-нің бесінші департаменті мен Алматы полиция департаменті Алматы, Шымкент қалалары, Алматы, Ақтөбе және Жамбыл облыстарының аумағында ұйымдасқан қылмыстық топ мүшелерін ұстау бойынша бірлескен арнайы операция жүргізді. Барлығы 23 адам ұсталды", – деді ІІМ ресми өкілі Ақтоты Боранова.
Ұйымдасқан қылмыстық топ бұрын сотталғандар мен криминалдық бағдарланған адамдардан тұрған. Олардың пайдакүнемдік және зорлық-зомбылық, соның ішінде қару қолдану арқылы жүргізілген қылмыстарға маманданғандығы белгілі болды.
Ақтоты Боранованың айтуы бойныша, қылмыстық топ қарыздарды өндірумен, бопсалаумен және заңсыз майнингпен айналысатын адамдарға "қамқорлық жасаумен" айналысқан.
Қылмыскерлер Алматы облысының Талғар ауданы аумағындағы заңсыз майнинг фермаларының қызметі есебінен ай сайын 300-500 мың доллар көлемінде пайда тапқан. Аталған фермаларды тінту кезінде ұйымдасқан қылмыстық топтың 7 мүшесі ұсталды.
Қылмыстық топ 36 жастағы IT маманын бопсалау және қорқыту арқылы майнингтік фермалардың жұмысын ұйымдастыруға мәжбүрлеген.
Заңсыз сақталған қарудың тұрған жерін анықтау бойынша жедел операцияны жүргізу кезінде топтың үш мүшесі ұсталды. Олардың ішінде әскери қызметші де бар. Олардан АКСУ автоматы, 60 патрон мен Сталкер, Ретайл маркалы тапаншалар алынды.
Жедел уәкілдер тінту нәтижесінде заттай дәлелдемелер мен қылмыс құралдарын, жалпы сомасы 7 млн доллар болатын майнингтік фермалардың жұмысына арналған жабдықтардың 6000-нан астам атауын, Макаров тапаншасын, жалған автокөлік нөмірлерінің 3 жиынтығын тәркіледі.
