Оңтүстік астанаға шетелден келген 26 жолаушы өздерімен байланыста болған 45 адамға Covid-19 жұқтырған. Бұл туралы Өңірлік коммуникациялар қызметінде өткен брифингте тауарлар мен қызметтердің сапасы мен қауіпсіздігін бақылау департаментінің басшысы Айзат Молдағасымова айтты.
"Шетелден келген 26 жолаушы өздерімен байланыста болған 45 адамға жұқтырған. Ал 2 жағдай жергілікті. Олармен де байланыста болған адамдар бар", – деді департамент басшысы.
Осы уақытқа дейін Алматыда 8305 адам коронавирусқа тест тапсырған, оның 73-інде инфекция анықталған. Бұл жалпы көрсеткіштің 0,9%-ы.
"Әлемдік тәжірибе көрсеткендей коронавирусты алдын алудың негізгі жолы – оқшаулану екенін еске салғым келеді. Қазіргі кезде ауру белгілері бар адамдардың барлығынан сынамалар алынуда. Яғни кеңейтілген тексеріс жүргізіліп жатыр. Қазіргі кезде қалада 24 ауру ошағы бар. Олардың барлығы оқшауланған", – деді Айзат Молдағасымова.
Құралай Құдайберген
