Конкурстық іріктеуге қатысуға өтінімдер мемлекеттік қызметтер порталы – eGov.kz арқылы онлайн түрде қабылданады, деп хабарлайды inbusiness.kz Ғылым және жоғары білім министрлігіне сілтеме жасап.
Жылдың соңына дейін "Болашақ" стипендиясына өтінімдерді қабылдаудың тағы екі легі өтетін болады: 5 маусым мен 7 шілде аралығында, сондай-ақ 17 шілде мен 15 қыркүйек аралығында.
Биыл "Болашақ" стипендиясы үміткерлеріне қойылатын талаптар күшейтілді. Енді үміткерлер шет тілін меңгергенін растауы тиіс. Ағылшын тілінде академиялық оқуға түсушілер нәтижесі кемінде 9.0-ден 6.0, тағылымдамадан өтушілер нәтижесі 9.0-ден 5.0 IELTS сертификатын ұсынуы керек.
Сонымен қатар жыл басында жетекші шетелдік жоғары оқу орындарында академиялық оқуға арналған квоталық санаттар тізімі кеңейтілді. Оқуға түсушілерді қолдау үшін инженерлік-техникалық кадрлар мен медицина мамандары үшін жеңілдіктер енгізілді. Аталған өзгертулердің арқасында қазақстандық дәрігерлер мен техникалық қызметкерлердің мерзімі 12 айға дейінгі тегін тілдік дайындықтан өтіп, "Болашақ" стипендиясы тағайындалғаннан кейін бағдарлама аясында білім алуға ұсынылатын университеттер тізімінен оқу орнын таңдауға мүмкіндігі бар.
Айта кетсек, биыл магистратура және резидентура бағдарламаларына 395 стипендия, докторантураға 50 стипендия, тағылымдамадан өту үшін 110 стипендия бөлінді.
