3 жылда елдегі ауыл шаруашылығына құйылған негізгі инвестиция 44% өсті. Бұл туралы Ауыл шаруашылығы вице-министрі Жеңіс Өсербай айтты, деп хабарлайды inbusiness.kz тілшісі.
Оның айтуынша, әлемде және Қазақстанда азық-түлік қауіпсіздігі мәселесі өзекті.
"Оны шешу және ауыл шаруашылығын тұрақты дамыту үшін еліміз бағдарламалар мен құжаттар шеңберінде нақты шараларды қабылдап жатыр. Нәтижесінде соңғы 3 жылда ауыл шаруашылығында жалпы ішкі өнім 1,4 есе өсті. 2020 жылы 6,3 трлн теңгенің ауыл шаруашылығы өнімі өндірілді. Ауыл шаруашылығы өнімдерін өңдеу мен экспорт көлемі 6% өсіп, шамамен 3,3 млрд доллар болды, - деді министрдің орынбасары елордада өткен азық-түлік қауіпсіздігі тақырыбында өткен семинарда.
Жеңіс Өсербай ауыл шаруашылығы саласының инвестициялық тартымдылығы артқанын жеткізді.
"3 жылда ауыл шаруашылығына құйылған негізгі инвестиция 44% өсті, әрі өткен жылы ол 570 млрд теңге болды. Мұндағы жеке инвестицияның үлесі шамамен 70%", - деді вице-министр.
Сондай-ақ ол агроөнеркәсіп кешеніндегі еңбек өнімділігінің орташа жылдық өсімі 7% екенін атап өтті.
Дәурен Ерболат
