Жерорта теңізінде тунистік кемемен қақтығысқан қайық суға батып кетті, деп хабарлайды 24.kz.
Апат салдарынан шамамен 30 шақты адам қаза тапқан. Әзірге суға батқан 8 адамның денесі табылды. Қалғандары іздестіріліп жатыр. Кеме бортында 78 кісі болған. Бұл туралы көші-қон жөніндегі халықаралық ұйымның өкілі айтты.
Оқиға Мальта аралдарының маңында болған. Зардап шеккендерге италиялық жағалау күзеті көмекке келген. Құтқару операциясына 3 катер мен бір кеме жұмылдырылған.
Айта кетейік, Еуропа ІІ Дүниежүзілік соғыс кезінен бергі ең ауыр көші-қон дағдарысын бастан кешіп отыр. Бұған Африка мен Таяу Шығыстағы қарулы қақтығыстар мен экономикалық мәселелер себеп. Шілде айының соңында көші-қон жөніндегі халықаралық ұйым берген дерек бойынша жыл басынан бері Еуропаға теңіз арқылы 111 мыңнан астам адам қоныс аударған.
