Өңір басшылары оқушыларын қашықтықтан оқыту үшін 80 мыңнан астам компьютер сатып алады, деп мәлімдеді Білім және ғылым министрі Асхат Аймағамбетов.
Интерфакс-Қазақстан агенттігінің хабарлауынша, Нұр-Сұлтанда өткен брифингте Білім және ғылым министрі: "80 мыңнан астам компьютер сатып алу жоспарлануда. Бюджеттік өтінімдер бар, жергілікті атқарушы органдардың бюджетінде үнемдеу бар. Біз бұл компьютерлерді сатып алып, мектептердің балансына қоямыз, содан кейін оларды оқушыларға пайдалануға береміз", – деген.
Сонымен қатар, қазіргі уақытта мектептер балансында тұрған компьютерлер қашықтықтан оқуға мүмкіндігі жоқ оқушыларға уақытша пайдалануға беріледі.
"300 мыңнан астам балада компьютер жоқ екенін, сондай-ақ бірнеше жүз мың баланың интернетке қосылмағанын білдік. Сол себепті бұл үлкен жұмыс", – деп толықтырды министр .
Қазақстан оқушылары коронавирус қаупі салдарынан көктемгі каникулға бір апта ерте шыққан еді. Ал IV тоқсан 6 сәуірде басталады және оқушылар қашықтықтан оқиды.
