Республика бойынша 4 763 рұқсат етілмеген қоқыс үйіндісі анықталды, деп хабарлайды inbusiness.kz Экология, геология және табиғи ресурстар министрлігінің баспасөз қызметіне сілтеме жасап.
Рейд 24 маусымда басталып, бес ірі өңірде: Қарағанды, Павлодар, Алматы, Ақмола және Шығыс Қазақстан облыстарында іс-шаралар өткен.
"Рекреациялық аймақтарға экология департаменттерінің, әкімдіктердің, жергілікті полиция қызметінің өкілдері және 30-дан астам эковолонтерлер шықты. Бір күндік жұмыс нәтижесінде 20 заңсыз қоқыс орны анықталды, олардың 13-і сол күні жойылды. Сонымен қатар, 6 ескерту беріліп, 10 АЕК көлемінде әкімшілік айыппұл салынды", -- деп жазылған ведомство таратқан ақпаратта.
Министрлік бұл рейдтік іс-шаралардың бастамасы ғана деп отыр.
"Апатты үйінділерін жою кестесі ағымдағы жылдың қыркүйек айының соңына дейін барлық өңірлерге мерзімді сапарларды қарастырады. Кейінгі рейдтердің нәтижелері қосымша жарияланатын болады",-- деп жазылған хабарламада.
