Жыл басынан бері Қазақстандағы автожолдың ұзындығы 95,8 мың шақырым болды, деп хабарлайды inbusiness.kz порталы finprom.kz-ке сілтеме жасап.
Бұл көрсеткіш өткен жылмен салыстырғанда 0,1%-ға артық.
95,8 мың шақырым жолдың 38,8 мың шақырымы аудандық, 32,1 облыстық, 24,9 мың шақырым халықаралық және республикалық маңызы бар жол болып саналады.
Еліміздегі ең ұзын жол Шығыс Қазақстан облысында: 12 мың шақырым. Үздік үштікке Алматы (9,6 мың шақырым) Қостанай (9,3 мың шақырым) облыстары енді. Ең қысқа жол Маңғыстау облысында: 3 мың шақырым.
Қолданыстағы жолдың ұзындығы Маңғыстау облысында артып, Павлодар облысында азайған.
Жолдың 48,7%-ы немесе 46,6 мың шақырым (өткен жылмен салыстырғанда 0,4%-ға аз) төртінші санатқа, 29,2%-ы немесе 28 мың шақырым жол (бір жылда плюс 0,3%) үшінші санатқа жатқызылды. Бесінші санаттағы жолдың ұзындығы – 11,7 мың шақырым, екінші санаттағы жол – 6,3 мың шақырым, бірінші санаттағы жол – 3,1 мың шақырым.
Бірінші және екінші санаттағы қолданыстағы автожолдың басым бөлігі Алматы облысы, үшінші санаттағы жол – Қостанай облысы, төртінші санаттағы жол – Шығыс Қазақстан облысы, бесінші санаттағы жол Солтүстік Қазақстан облысында орналасқан.
Айта кетейік, жолдың көліктік-пайдалану көрсеткіштері мен тұтынушылық қасиеттері бойынша автожол төмендегі санаттарға бөлінеді:
• жолақтардың саны мен ені;
• орталық бөлу жолағының болуы;
• автомобиль және темір жолдары, трамвай, велосипед және жаяу жүргінші жолдарымен қиылысу түрі,
• бір деңгейде түйісуі бар автожолға кіру шарттары.
2021 жылғы қаңтар-сәуірде автожолдағы негізгі капиталға салынған
инвестиция 39,4 млрд теңге болды.
Инвестицияның жартысынан астамы (52,1%) Алматы облысының үлесінде: 20,5 млрд теңге. Екінші және үшінші орында: Ақтөбе (8,8 млрд теңге) және Қарағанды (3,7 млрд теңге) облыстары.
Индустрия және инфрақұрылымдық даму министрлігінің мәліметінше, 2021 жылғы 1 маусымда 4 ақылы автожол учаскесінен 2,3 млрд теңге түскен. 2020 жылы 5,7 млрд теңге жиналды. Барлық жиналған қаражат жолды күтіп ұстауға жұмсалады.
Дәурен Ерболат
