2018 жылы Қазақстанның батысы мен оңтүстігіндегі төрт облыста газ қымбаттайды, деп хабарлайды ҚазАқпарат.
ҚР ұлттық экономика министрлігі табиғи монополияларды реттеу, бəсекелестік пен тұтынушылар құқығын қорғау комитеті агенттігінің берген мәліметі бойынша, "ҚазТрансГаз Аймақ" АҚ 2018 жылдың 1 қаңтарынан бастап Ақтөбе, Жамбыл, Батыс Қазақстан жəне Оңтүстік Қазақстан облыстарының тұтынушылары үшін тауарлық газ бағасын көтеру туралы хабарлама жіберді. Бағаны қымбаттатудың негізгі себебі - Ақтөбе, Жамбыл, Батыс Қазақстан жəне Оңтүстік Қазақстан облыстарындағы қоғамдастықтың газ тарату жүйесі бойынша тауарлық газды тасымалдау қызметіне тарифтердің ҚР табиғи монополиялар туралы заңнамасына сәйкес бекітілген шекті деңгейінің өзгеруі болып отыр. Сондай-ақ шикізат пен материал құнының, өзге ұйым қызметтерінің қымбаттауы сынды тауарлық газды бөлшектеп сату бойынша қоғамдастық шығындары көбейіп кеткен.
