Алматы, Шымкент, Ақтөбе, Павлодар және Тараз қаласында коронавирусқа қарсы вакцина паспортын сатумен айналысқан медицина қызметкерлері мен басқа да адамдар ұсталды, деп хабарлайды inbusiness.kz Қаржы мониторингі агенттігіне сілтеме жасап.
Заң бұзу дерегі жедел-іздестіру іс-шаралары барысында анықталған.
"Олар ақша табу үшін денсаулық сақтау органдары қойған міндеттер мен мораль нормаларына қарамастан адамдарға жалған вакциналау жүргізген. Жалған паспортты 5-30 мың теңгеге сатқан",– деп жазылған хабарламада.
Бұл факт бойынша Қылмыстық кодекстің 385-бабында (жалған құжат жасау) көзделген қылмыстық құқық бұзушылық құрамының белгілері бойынша сотқа дейінгі 7 тергеу басталды. Бүгінде жалған төлқұжат берілген 37 адам анықталды.
Сонымен қатар 12 адам, оның ішінде 8 медицина қызметкерінің жалған құжат жасағаны белгілі болды.
Басқа күдіктілерді анықтау бойынша тергеу шаралары жалғасып жатыр.
