5 маусым күні Нұр-Сұлтанда Аtameken FEST форумы өтеді. Форумға жас кәсіпкерлер, сонымен қатар кәсіп бастағысы келетін жастар жиналады, деп хабарлайды atameken.kz.
Белгілі вайнер және Yuframe жобасының мүшесі Арман Юсупов Atameken FEST форумының хэдлайнері болады.
Ал фестивальдің ең басты оқиғасы – "Atameken Academy" кәсіпті енді бастаған және жұмыс істеп жатқан кәсіпкерлерге арналған білім беретін бірегей платформасы және Ұлттық кәсіпкерлер палатасының – "Жас кәсіпкер" білім беру жобасының іске қосылуы болмақ.
"Atameken Academy" – кәсіпті енді бастаған және жұмыс істеп жатқан кәсіпкерлерге арналған білім беретін бірегей платформа. Аталған платформа жастарды оқытып қана қоймай, сондай-ақ платформаны қолданушылар арасында олардың тілдесуі, тәжірибе алмасуы, түрлі бағыттар: бизнес, өзін-өзі дамыту, бизнес-сөздік, бизнес-кейстер, бизнеске кіріспе, инструментарий, жарнама және маркетинг, әлеуметтік желілер бойыша қызықты сұрақтарға жауаптар алып, сонымен қатар мотивациялық бейнежазбалар, шеберлік сабақтар, Қазақстанның табысты кәсіпкерлерінің кеңестері шоғырланған кәсіпкерлік қоғамдастықты қалыптастырады.
"Жас кәсіпкер" – оқу жобасы ел аумағында тиімділігін көрсеткен, танымал "Бастау Бизнес" жобасы шеңберінде жүзеге асырылады. Жоба 18-29 жас аралығындағы жұмыссыз, тұрақты табысы жоқ қыз-жігіттерге бағдарланған.
Atameken FEST республикалық форумына қатысу үшін atameken.co адресіне өтінім жіберуге болады.
