2021 жылғы қаңтар-шілдеде Қазақстанда табиғи газды өндіру 31,9 млрд текше метр болды. Бұл өткен жылдың осы кезеңімен салыстырғанда 4,3% аз, деп хабарлайды inbusiness.kz порталы energyprom.kz-ке сілтеме жасап.
Ең көп газ Атырау облысында өндірілген: 14,3 млрд текше метр – өткен жылмен салыстырғанда 2,7% аз. Үздік үштікке Батыс Қазақстан (11,8 млрд текше метр, бір жылда минус 5,3%) және Ақтөбе (3,3 млрд текше метр, минус 5,9%) облыстары енді.
Аталған өңірлерде "Теңізшевроил" ЖШС, "Ембімұнайгаз" АҚ, "Қарашығанақ Петролиум Оперейтинг Б.В." және тағы басқа компаниялар жұмыс істейді. Еліміздегі газ өндірудің ұлттық операторы – "ҚазМұнайГаз" ұлттық компаниясы.
Биыл қаңтар-шілдеде ақшалай мәнде 145 млрд теңгенің табиғи газы өндірілген. 2020 жылы 55,4 млрд текше метр газ өндірілді. Бұл өткен жылмен салыстырғанда 2,3% аз.
2021 жылғы қаңтар-маусымның қорытындысы бойынша Қазақстан 682,8 млн доллар болатын 9 млрд текше метр табиғи газды экспортқа шығарған. Төмендеу бір жылда заттай көріністе 6%, ақшалай мәнде 39,1% болды.
Сектордағы экспорттың 55% ТМД елдеріне жіберілді: 4,9 млрд текше метр, өткен жылмен салыстырғанда 28,8% артық (алайда құндық мәнде 41,8% аз). Мұнда Ресей көшбасында тұр: 4,8 млрд текше метр табиғи газ, қалған 163,1 млн текше метр газды Қырғызстан сатып алған.
ТМД-ға кірмейтін елдерге 4 млрд текше метр табиғи газ жіберілген: өткен жылмен салыстырғанда 29,3% аз (ақшалай мәнде 38,7% аз). Қытай (3,5 млрд текше метр табиғи газ) және Швейцария (560,6 млн текше метр табиғи шаз) көш бастап тұр.
Энергетика министрлігінің мәліметінше, газ қоры бойынша Қазақстан әлемде 22-орында, ал ТМД елдері арасында Ресей мен Түркіменстаннан кейін 3-орында.
2021 жылғы шілдеде газ бағасы бір жылда 2,9% өскен. Оның ішінде баллондағы сұйытылған газ 6,7%, тарату желілері арқылы тасымалданатын газ 1,8% қымбаттаған.
Шығыс Қазақстан облысында газ бағасы бірден 15,3%, Солтүстік Қазақстан облысында 8,7%, Қызылорда облысында 5,5% көтерілген.
Сондай-ақ Шымкент қаласы, Батыс Қазақстан және Маңғыстау облыстарында газ бағасы өткен жылғы деңгейде қалған, ал Атырау, Жамбыл және Павлодар облыстарында газ арзандаған.
Дәурен Ерболат
