2021 жылғы бірінші жартыжылдықта құндық мәнде темір кенін өндіру көлемі рекорд деңгейге жетіп, 487,6 млрд теңге болды, деп хабарлайды inbusiness.kz порталы energyprom.kz-ке сілтеме жасап.
Ал өнеркәсіптік өндіріс индексі – 101,8%.
Өткен жылғы қаңтар-маусымда кенді өндіру көлемі 207,8 млрд теңге болған.
Темір кенін өндіру көлемінің басым бөлігі Қостанай облысының үлесінде: 461 млрд теңге. Кейін тізімде Қарағанды облысы тұр: 21,2 млрд теңге. Қалған 4 өңірге 5,5 млрд теңге тиесілі.
Заттай мәнде темір кенін өндіру 45,4%-ға немесе 32,1 млн тоннаға өскен. Осылайша, екінші жыл қатарынан салада өсім байқалып отыр (2020 жылы плюс 7%).
Биыл қаңтар-маусымда өндірудің басым бөлігі агломерацияланбаған темір кенінің үлесінде: 19,5 млн тонна. Темір кені концентраттарын өндіру – 6,4 млн тонна, шекемтастар – 3,1 млн тонна, агломерат – 2,8 млн тонна.
Елімізде агломерацияланбаған темір кені көлемінің 85,1%-ы Қостанай облысына тиесілі (өткен жылғы көрсеткіш – 70%), бір жылда кенді өндіру көлемі 2,2 есе өскен: 16,6 млн тонна.
Қарағанды облысында да айтарлықтай көлемде кен өндірілген:
2,7 млн тонна. Алайда өткен жылдың осы кезеңімен салыстырғанда 7%-ға аз. Темір кенін өндірудің қалған бөлігі Ақтөбе (210,9 мың тонна) және Түркістан (36,2 мың тонна) облыстарына тиесілі.
Дәурен Ерболат
