Еліміздің 6 қаласында қоқыс жағатын зауытты салу үшін кемінде 180 млрд теңге инвестиция тарту керек. Бұл туралы экология, геология және табиғи ресурстар вице-министрі Ахметжан Пірімқұлов айтты, деп хабарлайды inbusiness.kz тілшісі.
Оның айтуынша, жыл соңына дейін аукцион өткізіліп, жобаларды жүзеге асыратын инвесторлар анықталады.
"Алдағы 3 жылда Ақтөбе, Алматы, Өскемен, Нұр-Сұлтан, Қарағанды және Шымкент қалаларында қоқыс жағатын зауыт салынады. Жоспарға сәйкес 2024-2025 жылдың соңына дейін зауыттарды инвесторлар іске қосуы керек. 6 зауытқа кемінде 180 млрд теңге инвестиция тарту қажет", - деді Ахметжан Пірімқұлов.
Вице-министр зауыттың бағасы әр өңірде әртүрлі болатынын жеткізді.
"Нұр-Сұлтанда жылына 300 мың тонна, Ақтөбеде жылына 120 мың тонна қоқыс жиналады. Яғни қоқыстың көлемі мен технологияға байланысты зауыттың бағасы 20-40 млрд теңге аралығында болуы мүмкін. Сондықтан 6 өңірде салынатын зауыттың бағасы әртүрлі болады", - деді министрдің орынбасары.
Экология министрлігінің мәліметінше, елімізде қатты тұрмыстық қалдықтардың жиналуын азайту үшін "Waste to Еnergy" технологиясы қолданылады. 6 өңірде салынатын зауыт аталған технология бойынша жұмыс істейді. Яғни қалдықтарды энергетикалық кәдеге жарату енгізіледі. Қоқыс өртеліп, электр қуаты өндіріледі.
Дәурен Ерболат
