"Қаржы орталығы" АҚ білім алушылардың несиесіне кепілдік береді. Бағдарлама мемлекеттік білім грантын ала алмаған талапкерлер мен студенттерді қолдауға арналған.
Айта кетейік, биыл мемлекеттік грант саны 5 мыңға артты. Бакалаврға – 56 мың, магистратураға – 13 мыңнан және докторантураға – 1 800-ден астам мемлекеттік грант тағайындалды.
Министрліктің баспасөз қызметі хабарлағандай, ізденушілер мемлекет кепілдігімен несие рәсімдеу арқылы оқу ақысын төлей алады.
"Білім несиесін алған студент оқуын аяқтағаннан кейін 6 айдан соң негізгі қарызды өтей бастайды. Несие мөлшері шектелмеген, ең бастысы, ол оқу құнынан аспауға тиіс. Түлек айыппұлсыз қарызды мерзімінен бұрын төлей алады", – деп нақтылады баспасөз қызметі.
Несие екінші деңгейлі банктер арқылы рәсімделеді. Талапкер білім беру несиесін алу үшін серіктес қарыз алушыны ұсынуға тиіс. Ол банкке жұмыс орнынан соңғы 6 айдағы кірісі мен зейнетақы аударымы туралы анықтамаға тапсыруға міндеттеледі. Екінші деңгейлі банктің оң шешімінен кейін қарыз шарты жасалып, тиісті қаражат оқу орнының шотына аударылады.
Қанат Махамбет
