8 наурыздағы мереке күні ел бойынша жедел жәрдем бригадалары 103 диспетчерлік қызметінің пультіне келіп түскен 22,7 мың шақыртуға қызмет көрсетті, деп хабарлайды inbusiness.kz сайты.
Оның ішінде 1147 шақырту бірінші санатқа, 6723 – екінші санатқа, 6220 үшінші санатқа және төртінші санат бойынша емханалар жанындағы бригадалар 8624 шақыртуға қызмет көрсетті.
"Бұл күні ауыр диагнозы бар пациенттерге 15 телемедициналық консультация берілді, санитариялық авиация бір рет ұшуды жүзеге асырды. Жедел коронарлық синдромы бар ер адам санавиация бортымен Құрманғазы кентінен Атырау облыстық ауруханасына жеткізілді", – делінген мәліметте.
Қазіргі уақытта ел бойынша медициналық жедел жәрдем қызметін 20 дербес станция, 98 қалалық кіші станция және 232 аудандық бөлімше ұсынады.
Облыстық және қалалық жедел жәрдем станцияларында бір ауысымда 1 491 көшпелі бригада, МСАК (емхана) ұйымдарының жанындағы шұғыл 4-санаттағы шақыртуларға қызмет көрсету үшін 446 бригада жұмыс істейді.
