Атырауда 80 жастағы зейнеткер өзіне күтім мен қамқорлық көрсетпеген 8 баласы мен 1 немересінен алимент өндіруді талап етіп, сотқа жүгінді.
Шағымда зейнеткердің 10 жылдан астам уақыт жалғыз тұратыны көрсетілген.
Оның айтуынша, туыстарының ішінде тек бір ұлы ғана анда-санда хабарласады, ал қалған балалары мен немересі материалдық не моральдық қолдау білдірмеген.
Зейнеткер денсаулығы мен қаржылық жағдайының нашарлауына байланысты туыстарының көмегіне мұқтаж екенін айтқан.
"Неке (ерлі-зайыптылық) және отбасы туралы" кодекстің 145-бабы 1-тармағына сәйкес, кәмелетке толған еңбекке қабілетті балалар көмекке мұқтаж, еңбекке жарамсыз ата-аналарын асырауға міндетті.
Сондай-ақ, кодекстің 153-бабына сай, егер ата-әжелер алиментті балаларынан немесе жұбайынан (бұрынғы жұбайынан) өндіре алмаса, онда кәмелетке толған еңбекке қабілетті немерелерінен алимент талап етуге құқылы.
– Атырау қалалық соты тараптардың материалдық және отбасылық жағдайын зерттей келе, зейнеткердің талабын ішінара қанағаттандыру туралы шешім шығарды. Сот оның тамақ және дәрі-дәрмек шығындары үшін 8 баласы мен немересінің әрқайсысынан 3 АЕК мөлшерінде алимент өндіруге қаулы етті. Аталған шешім әлі заңды күшіне енген жоқ, – делінген хабарламада.
