Үкімет отырысында Индустрия және инфрақұрылымдық даму министрі Бейбіт Атамқұлов отандық кәсіпорындар фармацевтикалық өнім өндірісін 34,1%-ға арттырғанын айтты.
"Отандық фармацевтика саласында 96 кәсіпорын жұмыс істейді. Олардың 33-і дәрілік заттар, 41-і медициналық бұйымдар және 22-сі медициналық техника өндіреді. Бес мыңнан астам адам фармацевтика өнеркәсібінің тұрақты қызметін қамтамасыз етеді. Ірі өндіріс ошақтары еліміздің 4 өңірінде – Алматы мен Шымкент қалаларында, Алматы және Қарағанды облыстарында орналасқан. Олар дәрі-дәрмек пен медициналық бұйымдар өндірісінің 75% қамтамасыз етеді", – деді Бейбіт Атамқұлов.
Оның сөзінше, сала кәсіпорындарының тұрақты қызметі нәтижесінде 2019 жылы өндіріс көлемі 18% өсіп, 92 млрд теңгені құрады.
"Экспорт 69% артып, 59 млн АҚШ долларына жетті. Биылғы 8 айда отандық кәсіпорындар фармацевтикалық өнімдерге деген жоғары қажеттілікті қамтамасыз етіп, өндіріс 34,1% немесе 81,5 млрд теңгеге өсті. Инвестиция 5,2% артып, 4,1 млрд теңгені құрады", – деді министр.
Қанат Махамбет
