Таразда өткен "Қазақстанның үздік тауары" дәстүрлі өңірлік көрме-байқауына 150-ден астам кәсіпкер қатысты, деп хабарлайды 24.kz.
Олар өздері өндіріп отырған тауардың 300-ден астам түрін ұсынды. Биыл қатысушылар саны да, өнім түрлері де екі есеге артқан. "Бұл сапаға жұмыс істейтін кәсіпкерлердің жыл санап артып келе жатқандығын көрсетеді", – дейді ұйымдастырушылар.
Сонымен қатар отандық тауар өндірушілердің өнімдері қойылған "Жамбыл өнімдері" көрме-жәрмеңкесі өтті. Оған шалғай аудандарда шаруасын дөңгелетіп отырған ауылдық кәсіпкерлер келді. Шараны өткізудегі негізгі мақсат – отандық тауардың сапасын жақсартып, кәсіпорындар жұмысының белсенділігін арттыру. Байқау барысында өнімдер үш бағыт бойынша сараланды. Нәтижесінде 9 кәсіпорын үздік атанып, республикалық байқауға жолдама алды.
