А.Клебанов: "Меншігімізге 2007 жылы өткен Екібастұздағы ЖЭО-дан пайда көргем жоқ, қажет болса 1 тиынға мемлекетке өткізуге дайынмын"

664

"Екібастұзжылуэнерго" қожайыны Мәжіліс депутаттарымен кездесіп, сұрақтарына жауап берді.  

А.Клебанов: "Меншігімізге 2007 жылы өткен Екібастұздағы ЖЭО-дан пайда көргем жоқ, қажет болса 1 тиынға мемлекетке өткізуге дайынмын" Фото: facebook/ Жанарбек Әшімжан

Екібастұз қаласындағы штабтың жиынына "Екібастұзжылуэнергоның" қожайыны Александр Клебанов қатысты, деп хабарлайды inbusiness.kz.

Бұл туралы Facebook-тегі парақшасында Мәжіліс депутаты Жанарбек Әшімжан жазды.

"Александр Клебанов – Қазақстандағы аса ірі дәулеті асқан 50 алпауыттың бірі. Биылғы жылдың есебі бойынша Клебановтың байлығы – 580 млн доллар. Құрамына "Павлодарэнерго" компаниясы кіретін "ЦАТЭК" АҚ-ның қожайыны. Зайыбы - Дарья Клебанова, Қазақстанның ақпараттық кеңістігіндегі ірі магнаттардың бірі.

Естеріңізде болса бұған дейін Қызылжардағы Жылу электр станциясында үлкен апат болып, бір жұмыскер қайтыс болған. Ол апат та осы тұлғаның иелігіндегі компанияда орын алған", - деп жазды ол.

Клебановқа бірнеше сұрақ қойылды.

"Журналистердің қатысуымен өткен жиында әріптесім Ерлан Сайыров орын алған апат төңірегінде Клебановқа қаржылық, моральдық жауапкершілікке қатысты бірнеше сауал қойған.

"Біздің меншігімізге өткен 2007 жылдан бері мен осы ТЭЦ-тан бір тиын пайда көргем жоқ, керісінше 17 млрд. теңге шығында отырмын… Қажет болса 1 тиынға қайтадан мемлекетке өткізуге дайынмын" деді станция қожайыны.

Сонда осыншама ауыр жағдайлар орын алған, сіздің иелігіңіздегі серіктестікте бір емес екінші мәрте апат орын алып отырған кезде ТЭЦ-ті бір тиынға мемлекет меншігіне қайтарып, барлық жауапкершіліктен құтылғыңыз келе ме?" - деген әріптесімнің қосымша сұрағына, "арнайы комиссия құрылып, жағдайдың жан-жақты, егжей-тегжейлі тергеп-тексерілуіне мен де мүдделімін", - деді Александр Клебанов.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу