Қазақстанның жұптық сындағы бірінші, әлемнің 51-ракеткасы Александр Недовесов Ұлыбританиядағы Истбурн ATP 250 турнирінің ширек финалына шықты, деп хабарлайды inbusiness.kz тілшісі.
Қазақстандық теннисші эквадорлық Гонсало Эскобармен бірге бастапқы кездесуін швециялық Андре Горанссон – жапониялық Бен Маклахланмен өткізді.
Бірінші партияда швециялық-жапониялық жұп тай-брейкте сәтті ойнады – 7:6 (7:4). Олардың екінші сетте де матчты жеңіспен түйіндейтін мүмкіндіктері болғанымен, оны пайдалана алмады.
Есесіне А.Недовесов пен Г.Эскобар таразы басын аудара білді – 7:6 (12:10). Сосын супер тай-брейкте дес бермеді – 10:5.
А.Недовесов пен Г.Эскобар жартылай финалға шығу үшін жарыстың 4-ракеткалары, хорватиялықтар Никола Мектич – Мате Павичпен таласады.
Ширек финалдық матч 29 маусымда өтеді, оның басталуы – Қазақстан астанасының уақыты бойынша 16:00.
