ШҚО әкімі Даниал Ахметовтің бастамасымен "2018-2020 жылдарға арналған менің аулам" бағдарламасы қабылданған еді. Биыл көп қабатты тұрғын үйлер маңындағы он екі ауланы абаттандыруға қалалық бюджеттен 611 миллион теңге бөлінді, деп хабарлайды egemen.kz.
"Семейдің көшелерін және аулаларды абаттандырып, гүлдендіріп, көріктендіруге қалалық бюджеттен 1 миллиард 196 миллион теңге бөлінді, – деді қала әкімі Ермак Бидахметұлы. – Бұл жұмысты күн сайын қадағалап отырмыз. Саламатты өмір салтын қалыптастыру үшін қаланың әр жерінде 11 спорттық алаң салу жоспарланған. Оған 90 миллион теңге қаражат берілді. Әсіресе Абай алаңын жөндеуге 87 миллион теңге бөлінуі қала тұрғындары арасында қолдау тапты. Қала көшелерін күрделі және ағымдағы жөндеуге осы жылға 2 миллиард 235 миллион теңге бөлінді. Жыл сайын қала көшелерінің жөнделуі тұрғындар тарапынан қолдау тауып отыр".
Көптеген жылдар бойы жөнделмеген Әсет Найманбаев көшесі жөндеуден өтуде. Сонымен қатар автокөлік көп жүретін Тәңірбергенов, Титов, Орманды, Қабанбай батыр, Аймауытов және тағы басқа көшелер жөнделуде. Қазіргі уақытта 36 көше жөндеуден өтті.
